Хъæдын Фæзыхъæуы куырой бæрæг æрцыд

Цæгат Ирыстоны культурон цыртдзæвæнтæ хъахъхъæныны комитет сбæрæг кодта ахсджиаг историон объекттæ цы уавæры сты, уый. Сæ балцы рæстæг федой Фæзыхъæуы куырой. Чысыл хъæдын арæзтад уым фæзынд 20 æнусы, 60-æм азты. Йæ кусæнгæрзтæй ныр дæр ма пайда кæнæн ис. Æмæ дзы бынæттон цæрджытæ æнæуи дæр архайынц. Куыд зæгъынц, афтæмæй куырой нырма бирæ ахæсдзæн. Ирон культурæйы æгъдæуттæм гæсгæ, донæй кусгæ куырæйттæ уыдысты ахсджиаг æмæ хъæугæ арæзтадтæ. Электрон ифтонгад хуыздæр кæнын куы райдыдта, технологитæ та рæзын, уæд сæ адæм нал пайда кодтой. Ныртæккæ нæ республикæйы ахæм куырæйттæ стæмтæ баззад.  Фæзыхъæуы куырой фыццаг бакастæй афтæ зыны, цыма кусгæ дæр нал кæны. Фæлæ, йæм мидæмæ куы бахизай, уæд æй фендзынæ, кæд зæронд у, уæддæр ма йæ куыст хорз кæй кæны. Сарæзтой йæ 1972 азы. Иумæйаг хъарутæй. Уарзиаты Æхсар йæ сабибонтæй нырмæ Фæзыхъæуы фæцарди. Йæхæдæг дæр куырой сарæзта æмæ йæ бæлвырдæй зоны, куыд кусы, уый. Йæ ныхæстæм гæсгæ, комы æндæр куырæйттæ дæр ис. Фæлæ фæстаг рæстæг стæмтæ систы. Фæзыхъæуы куырой кусы æрдзон тыхы руаджы, бæлвырддæр дзургæйæ та- цæугæдоны фæрцы. Цæмæй куырой æрзила, уымæн йын донæй къабаз райсынц. Уый фæстæ куырой мидæгæй æрзилы. Куыд зыны, афтæмæй хуымæтæг арæзт нæу. Йæ сæйрагдæр хай - дуртæ сты. Уыдон куыд зилынц, уымæ гæсгæ рауайы ссад. Кæд хорз арæзт сты, уæд ссад дæр рауайы хæрзхъæд. Раздæр куыройы алцыдæр ссадтой: кæрдзиинаг, арахъхъаг, зад. Сылгоймæгтæ ацы куытсмæ сæрæндæр уыдысты. Нæлгоймагтæй хуыздæр зыдтой куыройæ пайда кæнын. Кæрдзиинагæн æй куы хъуыди, уæд æй иухуызон ссадта, зад æй хъуыди, уæд та-æндæрхуызон.Суанг ма йæм рады дæр лæууыдысты. Фæзыхъæуы куырой иннæтæй та ма йæ уый хицæн кодта, æмæ зымæджы дæр кæй зылди. Ныр дзы афтæ арæх нал пайда кæнынц. Фæлæ, Джеоргуыба æмæ Уациллайы бæрæгбæттæм къуымæлæн зад кæддæриддæр ам бассынц. Электрон тыхы фæзындимæ, доны куырой сси ивгъуыд æнусты кусæнгарз. Фæлæ, Фæзыхъæуы цæрджытæ æнæ ацы куыройæ сæ цард нæ мысынц. Кæд дзы арæх нæ пайда кæнынц, уæддæр æм сæ цæст дарынц. Бахъуаджы йæ ссыгъдæг кæнынц. Ныртæккæ, зæгъæн ис, æмæ комы дыууæ-æртæ куыройы йеддæмæ нал ис. Уыдон дæр се 'ппæт нæ зилынц. Уымæ гæсгæ та ацы куырой бахъахъхъæнын у уæлдай ахсджиаг. Бынæттон цæрджытæ йын фæнд кæнынц йæ бæстыхаймæ иумæйаг тыхтæй базилын, цæмæй кæстæртæ дæр зоной, нæ рагфыдæлты культурæ æмæ йæ дарддæр хæссой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv