Цæрджыты цин, шофырты сагъæс

Ногиры ма фæзындысты ног маршрутон такситæ. Абоны онг хъæуы цæрджытæн Дзæуджыхъæумæ ацæуын стыр хъаймæт уыд. Хæдтулгæмæ-иу æппын къаддæр æртын минуты æнхъæлмæ кастысты. Дзæуджыхъæуы администраци бахатыд нæ республикæйы транспорты министрадмæ. Ныр 8-æм номыримæ маршрутон такситæ арæхдæр цæуын райдыдтой Ногирмæ.  Ногирæй Дзæуджыхъæумæ æмраст фæндаг у. Бæлццæттæласæн транспорты иу машинæйæ иннæйы бадын дæр нæ бахъæуы. 8-æм маршруты кæройнаг æрлæууæнтæ дæр хъæуы сты. Маршрут дыууæ азæй фылдæр кусы. Фæлæ кæд раздæр хъæуы цæрджытæ хъаст кодтой, маршруткæтæ фаг не сты, загъгæ, уæд абон уыцы фарста лыггонд æрцыд. Цæрджытæн ма ноджыдæр радих кодтой машинæтæ. «Маршрутон реестрмæ гæсгæ ацы фæндагыл куыстой 12 хæдтулгæйы. Махмæ бахатыд Ногиры хъæуы администрацийы сæргълæууæг æмæ нæ ракуырдта, машинæты бæрц фæфылдæр кæнын. Министрад курдиатмæ æркаст æмæ хæдтулгæты бæрц 12-æй 25-мæ фæфылдæр кодтам. Уый фæстæ маршрутыл къуылымпыдзинæдтæ нал разынд», — РЦИ-Аланийы Промышленность æмæ транспорты министрады автотранспорты хайады сæргълæууæг Хъараты Зауырбег. Ахæм ногдзинадæй Ногиры цæрджытæ тынг разыйæ баззадысты. Сæ ныхæстæм гæсгæ, машинæтæ 5 минутæй 5 минутмæ цæуынц. Уæдæ 8-æм маршрут горæты сæйраг æмæ центрон уынгтæм кæй цæуы, уый дæр адæмæн уæлдай æ нцойдзинад у. Сæ бон æнæ къуылымпыйæ у университетмæ, базарттæм æмæ медицинон дзæбæхгæнæндæттæм цæуын. Æхсæнадон транспорты шофыртæ дæр сæ маршрут фæдаргъдæр кæныны ныхмæ нæ уыдысты. Ногиры цæрджытæ та йыл уæлдай бацин кодтой. Ам ма зæгъын хъæуы уый æмæ хъæуы райдиан кълæсты ахуырдзауты ласынц лæвар. Фæлæ хистæртæ дæр иуæй-иу хатт сывæллæтты æфсонæй сæхи лæвар фæласын кæнынц. Ахæм пассажиртæ кæд бирæ не сты, уæддæр шофыртæ семæ æмбылынц алы бон дæр. Уымæ гæсгæ машинæты хицæуттæ сидынц адæммæ, цæмæй сæхиуыл æрхудой. Уымæн æмæ, цæмæй æхсæнадон транспорт æнæ къуылымпыйæ куса, ууыл иумæ бацархайын хъæуы. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv