Ног æнтыстдзинæдтæ

Цæгат Ирыстоны спортсментæ сæхи цæттæ кæнынц Европæйы ерыстæм уæззау атлетикæйæ. Чи сæ бацархайдзæн æппæтадæмон ерысты Батумийы , уый нæма сбæрæг. Спортсментæй иу дæр йæхиуыл тренеровкæты рæстæг нæ ауæрды. Афтæмæй нырма Уæрæсейы чемпионатæй æрæджы сыздæхдысты. Цæгат Ирыстоны иугонд командæ дзы равдыста хорз бæрæггæнæнтæ. Рамбылдтой 4 сыгъзæрин, 3 æвзист æмæ 2 бронзæ майданы. Бæлвырддæр ерысты тыххæй нæ дарддæры æрмæджы. Уæрæсейы кубок рамбулыны ерыстæм студенттæ сæхи 3 мæйы æмгъуыдмæ бæстонæй бацæттæ кодтой. Наниты Тимурæй сусæг дæр нæ кæны, зын ын кæй уыд уый. Наниты Тимур, æппæтадæмон æмвæзы спорты мастер уæззау атлетикæйæ: «Психологон æгъдауæй зын уыд хи бацæттæ кæнын. Дыууæ азæй фылдæр нæ архайдтам ерысты. Фæстаг хатт уыдыстæм 2016-æм азы Уæрæсейы чемпионаты . Уæд уæлахиздзау стæн. Ныртæккæ Уæрæсейы кубок рамбулыны ерысты райстон дыккаг бынат. Куыд ахæцыдтæн, уымæй разыйæ баззадтæн. Дарддæр ноджы бæстондæрæй кусдзынæн мæхиуыл».  Февралы райдиан горæт Старый Осколы цыдысты Уæрæсейы кубок рамбулыны ерыстæ уæззау атлетикæйæ сылгоймæгтæ æмæ нæлгоймæгты `хсæн. Нæ республикæйы кад дзы хъахъхъæдтой 12 спортсмены. 9 дзы систы уæлахиздзаутæ æмæ призертæ. Тренертæ сæ хъомылгæнинæгты æнтыстдзинæдтæй разыйæ баззадысты. Ерыстæ кæд фесты, уæддæр спортсментæн улæфынæн рæстæг нæй. Æнхъæлмæ сæм кæсы ног къæпхæн. Уæрæсейы ерысты сæхи æнтыстджынæй кæй равдыстой, уый сын фадат ратта Европæйы чемпионаты бацархайынæн. Уырдæм та хи хъæуы ноджы хуыздæр бацæттæ кæнын. Европæйы чемпионатмæ чи ацæудзæн, ууыл раджы у дзурын. Нырма уал цæттæгæнæн мадзæлттæ сты сæйрагдæр. Уыдоны хатдзæгтæм гæсгæ рабæрæг уыдзæн, Цæгат Ирыстоны кад ерысты чи хъахъхъæндзæн,уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv