Цæгат Ирыстон цæттæ у æвзæрстытæм

Нæ республикæйы цæрджытæй сæ хъæлæстæ радтой, дард хъæуты æмæ зындзæуæн бынæтты чи цæры, уыдон. Нымадæй уал сты 70 адæймаджы. Хъæлæсгæнджыты иумæйаг бæрц у 512 629. Сæ номхыгъдтæ сног кæныны тыххæй территориалон æвзарæн къамистæ егъау куыст бакодтой. Уыцы номхыгъдтæ арæзт æрцыдысты ЗАГС-ы, миграцион службæйы æмæ мидхъуыддæгты министрады бæрæггæнæнтæм гæсгæ. Нæ республикæйы æххæстгæнæг æмæ муниципалон хицауады органтæ байгом кодтой 347 иудадзыгон æвзарæн хайады. 21 дзы кусынц рынчындæтты, æфсæддон хайæдты, æфсæнвæндæгты вагзалты æмæ слестгæнæн изоляторты. 4 æвзарæн хайады та байгом кодтой, Уæрæсейы регистраци кæмæн нæй, уыцы адæмæн. Æппæт объектты дæр ис хъæугæ кусæнгарз - хъæлæсгæнæн кабинæтæ, информацион стендтæ, хæсгæ асыччытæ. Видеокамерæтæ сæвæрдтой 178 хайады. 18-æм мартъийы сæ руаджы комкоммæ бастдзинадæй фенæн уыдзæн æвзæрстытæ куыд цæуынц, уый. Адæмы æдасдзинадмæ сæ цæст дардзысты мидхъуыддæгты æмæ æнæнхъæлæджы уавæрты министрадтæ. Кусдзысты сæрмагонд фæткмæ гæсгæ. Бæлвырдгонд æрцыди, æнæнхъæлæджы цауты рæстæг цы кусын хъæуы, уый дæр. Бюллетентыл типографийы баныхæстой сæрмагонд хъахъхъæнæн æрмæджытæ, æмæ сæ мæнг гæххæттытæй фæивæн нæ уыдзæн. Ныридæгæн сты бынæттон æвзарæн къамисты. Цæлхдуртæ нæ фæзындзæн, бюллетентæ сæфт куы 'рцæуой, уæд дæр. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv