Къостайы хъæуы администрацимæ фидæнмæ бирæ пълæнттæ ис

Къостайы хъæу кæд стыр нæу, уæддæр бирæ хъуыддæгтæм гæсгæ у дæнцæгæн хæссинаг. Хъæуы цæрджытæн дзы ис царды уагæн æмбæлгæ уавæртæ. Фæстаг рæстæг куыд аивта хъæуы цард, стæй фидæнмæ пълæнтты тыххæй нæ уацхæссæг Хуасдзауты Алинæйæн радзырдта хъæуы администрацийы сæргълæууæг Джиоты Арсен. Бакæмæм ын йæ æрмæгмæ. Джиоты Арсен Къостайы хъæуы администрацийы кæд 2 азы йеддæмæ нæ кусы, уæддæр уыцы рæстæгмæ хъæу зынгæ аивта. Фæндæгты уавæр бæлвырд фæхуыздæр. Ныртæккæ нæ хъæуы æппæт уынгты дæр изæрыгон рухс æнæ къуылымпытæй судзы. Уæдæ хъæуы уынгты бырон дæр никуы ссардзынæ.Сыгъдæг æмæ райдзаст. Арсен куыд зæгъы, афтæмæй алы æртыццæджы дæр сæрмагонд хæдтулгæ бырон æнæцухæй ласы. Уæдæ хъæуы фæзынд ног культурæйы артдзæст дæр. Ацы бæстыхай сарæзтой 2017 азы федералон фæрæзтæй. Ныр ахæм Культурæйы хæдзар æгас районы дæр не ссардзынæ. Сабитæн дзы ис фадæттæ се сфæлдыстадон курдиæттæ æххæстæй раргом кæнынæн. Галуаны ис стыр зал 300 бынатæн. Кæддæриддæр дзы сабитæ сæхи фæлварынц алыхуызон сфæлдыстадон къордты. Ног культурæйы галуаны фæстæ лæууы Хетæгкаты Къостайы цыртдзæвæн. Ирыстоны ирддæр стъалыйы юбилеймæ гæсгæ цыртдзæвæн йæхи æмæ йæ алфамбылай цалцæг кæнын райдыдтой. Йæ алыварс йын сæвæрдзысты плиткæ. Цыртдзæвæн дæр сног кæндзысты. Арсены ныхæстæм гæсгæ, фидæнмæ сæм бирæ фæндтæ ис. Зæгъæм, хъæуы астæуккаг скъола. Хъæуы ис сывæллæтты рæвдауæндон дæр. Йæ кæрт у райдзаст æмæ сыгъдæг. Йæ бæстыхаймæ дæр кæддæриддæр хи хъарутæй базилынц. Вæййы дзы 3 къорды, æдæппæтæй йæм цæуы 60 сывæллоны. Кæд дзы хъæугæ уавæртæ ис, уæддæр бæстыхай у цалцæггæнинаг. Хæстæгдæр рæстæг ма фæнд кæнынц хъæуы сывæллæттæн хъазæн фæз саразын. Администрацийы сæргълæууæджы ныхæстæм гæсгæ, ацы фарстамæ бæстондæр цæстдард хъуамæ цæуа. Уыимæ ма, фæнд кæнынц хъæуы амбулатори дæр бындуронæй сцалцæг кæнын æмæ цалдæр уынджы фæндæгтæм цыбыр рæстæгмæ базилын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv