Зæрдæ риссы

Мæскуыйы дæр минут æдзæмæй лæугæйæ æрæмысыдысты абон Беслæны теракты амæттæгты. Номарæн мадзалы арахайджытæ дидинджытæ æмæ веноктæ сæвæрдтой сæрмагонд дæлхайæдтæ «Альфа» æмæ «Вымпелы» æдзард хæстонты æмæ æнæнхъæлæджы уавæрты министрады службæгæнджыты номыл цыртдзæвæнтыл - Николо-Архангелаг уæлмæрды, Жуковскийы, Мæскуыйы облæсты Раменскойы. Мысæн мадзæлтты архайдта УФ-йы сывæллæтты бартæ хъахъхъæнæг æххæстбарджын минæвар Анна Кузнецова. Сывæллæтты уæгъдгæнгæйæ йæ цард чи нæ бавгъау кодта, уыцы æфсæддонты номыл цыртдзæвæныл сæвæрдта дидинджытæ. Анна Кузнецова, УФ-йы сывæллæтты бартæ хъахъхъæнæг æххæстбарджын минæвар:«Æппæты сæйрагдæр у, цæмæй хъæбатыртæй иу дæр рох ма уа, цæмæй уыцы æдзард сывæллæттæ зæрдыл лæууой. Уый та уымæн, æмæ цæмæй ахæм цау макуыуал æрцæуа. Цæмæй йæ алчидæр æмбара - алы хъуыддаджы дæр хъæуы бæрнон уæвын, раст кусын. Æмбарын, дæ куыстæй искæй цард аразгæ кæй у, уый. Цардæй зынаргъдæр ницы ис. Рæзгæ удты хицæуттæн та - уæлдайдæр. Тынг мæ фæнды, цæмæй адæм кæрæдзийы цæстытæм бакæсой æмæ радон хатт сæхи бафæрсой: "Цымæ нæ сывæллæтты бахъахъхъæнынæн алцыдæр бакодтам?!» Фæткмæ гæсгæ, Мæскуыйы, Мады Майрæмы райгуырды аргъуаны цур дæр уыд мысæн акци. Йæ архайджытæ дидинджытæ сæвæрдтой Беслæны амæттæгты номыл монументыл, æрæмысыдысты уыцы сау бонтæ. Стæй арвмæ суагътой 334 урс-урсид тымбылæджы. 14 азы размæ террористтæ сæ цард кæмæн аскъудтой, уыдонæй алкæй номыл дæр. Мысæн мадзалы архайдтой Цæгат Ирыстоны минæварады кусджытæ, ирон адæмы æхсæнады уæнгтæ, ирыстойнаг студенттæ. Борис Джанаев: «Абон, радон хатт сæмбырд стæм Мæскуыйы æмæ æрбацыдыстæм ардæм. Йæ цард йæ райдайæны кæмæн аскъуыд, кæстæрты уæгъд кæнгæйæ, йæхиуыл чи нæ бацауæрста, уыдоны нæмттæ рох не сты. Хъуыды сæ кæнæм. Æмæ цалынмæ нæ зæрдæты цæрой, цалынмæ сæ нæ ферох кæнæм - уæдмæ сæ алчидæр цæрдзæн. Абон цыртдзæвæнты æмæ мемориалты цурмæ бирæ адæм цæуы. Уыцы æвирхъау цау та хъуамæ æрбангом кæна адæмы терроры ныхмæ. Цæмæй ахæм цау макуыуал æрцæуа». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv