Йæ цардæй ахицæн Андиаты Сослан

Хъыгагæн, нæ программæ райдайдзыстæм абоны уæззау хабарæй. Йæ цардæй ахицæн Андиаты Сослан. Ацы ном канд республикæйы нæ, фæлæ æгас бæстæйы чи нæ зоны, ахæм адæймаг нæ разындзæн.  Андиайы-фырт у Олимпаг хъæзтыты 2 хатты чемпион, уыцы ном нæ республикæйы райста фыццаг. 4 хатты та ссис Дунейы чемпион, 3 хатты - Европæйы чемпион. Андиаты Сослан райгуырд 1952-æм азы. 12 азы йыл куы цыд, уæд бауарзта уæгъдибар хъæбысхæст. Ссис иттæг дæсны уыцы спорты. Афтæ рауад, æмæ ма йе `фсымæртимæ иумæ æппæтуæрæсеон ерысты бацахста æгас пъедестал дæр. Ахæм æнтыст уæдæй фæстæмæ никæйуал къухы бафтыд. Йæхи аккагæй кæй февдыста йæ цардвæндагыл, уый тыххæй Андиаты Сосланы бар бакодтой ацы къабазимæ баст бæрнон бынæттæ. Уыдис Парламенты депутат, æхсæнадон кусæг, йе `нæзæрдæхудт фæллойы тыххæй йын саккаг кодтой бирæ паддзахадон хæрзиуджытæ. Зианджын бинонтæн тæфæрфæс ракодта республикæйы сæргълæууæг Битарты Вячеслав. "Сослан уыдис уæгъдибар хъæбысхæсты национ скъолайы номдзыддæр минæвар. Йæхиуыл фæуæлахиз уæвын чи нæ бауагъта, ахæм.  Æцæг бæгъатыр! Йæ курдиатæй уæлдай ма уыдис стыр æмæ хæлар зæрдæйы хицау. Не `хсæн кæй нал ис, уый канд йæ бинонты рис нæу. Андиаты Сослан йæхицæн æхсæнады скодта æнæфæцудгæ кад, æмæ йыл уымæн иууылдæр æрхæндæг зæрдæимæ хъыг кæнынц," - загъд ис Битарты Вячеславы тæфæрфæсы фыстæджы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv