Алагиры равзæрстой 15 хуыздæр архайæджы республикæйы æфсæддон цæттæдзинады ерыстæм

Ацы минутты сæйрагдæр у ма фæтыхсын. Жгут раст æртухын, æнæмæнг æрхæмы сæрмæ, цæмæй тугдадзин æлхъывд æрцæуа. Алы фезмæлдæй дæр аразгæ у адæймаг цæрдзæн æви нæ, уый. Дарддæры хæслæвæрд ноджы зындæр. Цæф æфсæддоны хъæуы базæмæ фæхæццæ кæнын. Уыимæ арæхстгай, йæ хъæдгомæ ма фæцагайгæйæ. Дарддæры къæпхæн - 10 метры дæрддзæгмæ мысан акъуырын. Уыимæ алыхуызон уавæрты. Ам фæсивæд тынг хорз сарæхстысты. Гыццыл фæтыхстысты æрмæст фæстаг къæпхæны. Физикон цæттæдзинад бæрæгггæнæг хæслæвæрдтæ разындзысты æппæты зындæр. Фæлæ æвзонг лæппутæ хорз сарæхстысты. Командæйы иумæйаг æнгом архайды руаджы равдыстой хорз бæрæггæнæнтæ. Бакусын сæ цæуыл хъæуы, уый дæр раиртæстой. Алагиры ерысты æдæппæтæй архайдта 21 командæйы. Мадзалмæ фæсивæд сæхи бæстонæй цæттæ кодтой. Æрвылбон архайдтой сæхи скъолаты. Иууылдæр хъуыддагмæ бæрнонæй бацыдысты. Æфсæддон цæттæдзинады республикон ерыстæн ай дыккаг къæпхæн у. Фыццаг ацыд скъолаты. Сæ хатдзæгтæм гæсгæ снысан кодтой районы иугонд командæ, равзæрстой 15 хуыздæр архайæджы. 11-æм апрельмæ ахæм ерыстæ ацæудзысты республикæйы алы районы дæр. Майы та хуыздæртæ сæ тыхтæ бафæлвардзысты финалы. Уæлахиздзаутæ республикæйы сæргълæууæг Сергей Меняйлойы номæй райсдзысты лæвæрттæ. Залина Калманова