Ног фæтк

Уæрæсейы тагъд æххуысы службæйы куысты фæзынд ивддзинæдтæ. Раст зæгъгæйæ, Цæгат Ирыстонæн ног не сты. Нæ республикæ ног домæнтæм гæсгæ кусы дыууæ азы. Хауынц рынчынты ласыны фæткмæ. Цæуыл цæуы ныхас Уæрæсейы æнæниздзинадхъахъхъæнынады министрады уынаффæйы æмæ цы пайда сты ногдзинæдтæ, уый базыдта нæ уацхæссæг Биджелты Бертæ. Телефон ныдздзæнгæрæг кодта, æмæ та республикон тагъд æххуысы диспетчер къарет æрвиты рынчынмæ. Уыимæ йæм хæстæгдæр цы хæдтулгæ вæййы, уый. Сæрмагонд системæ "Глонасс" æрæджы скуыста. Йе руаджы диспетчертæ фæкæсынц, тагъд æххуыссы бригадæ кæцы ран ис, уымæ. Ацы системæ, стæй тагъд æххуысы иумæйаг диспетчерон службæ кæй скуыстой, канд уыдон не сты ногдзинæдтæ. Уæрæсейы æнæниздзинад хъахъхъæнынады министрад ма сфидар кодта рынчынты тагъд æххуысы къареттæй ласыны ног фæтк. Михаил Ратманов, РЦИ-Аланийы æнæниздзинадхъахъхъæнынады министр:  «Рагæй æнхъæлмæ кастыстæм пациенттæн æцæгæйдæр æмбæлгæ æххуыс кæм бакæндзысты, уыцы уагдæттæм ласыны домæнтæ федералон æмвæзыл куыд сфидар кæной, уымæ. Рынчынты хъуамæ ласой уыцы рынчындæттæм, æцæгæй дæр сын кæм баххуыс кæндзысты æмæ сæ кæм аирвæзын кæндзысты. Ныхас цæуы уæззау рынчынты тыххæй - инфаркттæ æмæ инсульттæ кæмæн ис, кæнæ фæндаггон фыдбылызы чи бахауд, уыдоны». Ног домæнтæм гæсгæ, йæ цардæн тас кæмæн нæу, æрмæстдæр уыцы адæмы ласдзысты хæстæгдæр рынчындæттæм. Уæззау рынчынты та сæ низтæм гæсгæ æмбæлын кæндзысты профилон уагдæттæм. Электрокардиограф, дефибрилятор, улæфыны аппараттæ. Тагъд æххуысы къареты рынчыны фервæзын кæнынæн æппæт хъæугæ кусæнгарз дæр ис. Дохтыр рынчыны уавæр сбæрæг кæны, æмæ йæ куы хъæуа, уæд профилон рынчындонмæ баласы." Ног домæнтæ Уæрæсейы æнæниздзинадхъахъхъæнæн министрады нырма ныр сфидар кодтой. Фæлæ ацы фæткмæ гæсгæ нæ бæстæйы бирæ регионты тагъд æххуысы службæтæ рагæй кусынц. Цæгат Ирыстоны дæр се`хсæн. Специалистты ныхæстæм гæсгæ, рынчынты ласыны ног системæйы руаджы фæкъаддæр ис уæззау фæстиуджыты бæрц. Дохтырты ныхæстæм гæсгæ, рынчыны дарддæр ранмæ ласын кæй бахъæудзæн, уымæй тæрсын нæ хъæуы. Зæгъæм, районы рынчындоны пациентæн баххуыс кæныны фадат куы нæ уа, уæд æй дзæгъæл ласт дæр нæ хъæуы. Рæстæг сафыны хос йеддæмæ ницы у, зæгъынц дохтыртæ. Хъæуы йæ тагъддæр фæххæццæ кæнын уырдæм, хъæугæ кусæнгарз æмæ сæрмагонд специалисттæ кæм ис. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv