РЦИ-Аланийы сæргълæууæг Сергей Меняйлойы разамындæй Дзæуджыхъæуы уыд аппаратон æмбырд

Цæгат Ирыстоны дæрддзæф хъæуты фæзындзæн мобилон афтектæ. Ахæм хæс дзуапдæттæг министрады размæ аппаратон æмбырды сæвæрдта республикæйы сæргълæууæг Сергей Меняйло. Æмбырды архайджытæ ма дзырдтой хъармгæнæн рæстæг районты куыд цæуы, ууыл. Дæрддзæф хъæуты афтектæ кæй нæй, уый аппаратон æмбырды сси фарстаты фыццаг. Зæгъæм, Нузалы. Республикæйы æнæниздзинад хъахъхъæнынады министр Тебиаты Сосланы ныхæстæм гæсгæ, ныртæккæ фарстайыл кусынц. Сергей Меняйло бабар кодта, цæмæй дæрддзæф хъæуты цæрджытæн фадат уа хъæугæ хостæ æрвылбон æнæ къуылымпытæй амал кæнынæн. Уый тыххæй хъæуы мобилон афтектæ байгом кæнын. Хицауады уæнгтæ ма ныхас кодтой медицинон туаггуырæй ифтонгадыл. Регионы разамонæг куыд фæнысан кодта, афтæмæй республикон рынчындæттæй иуы бындурыл хъуамæ æнæмæнг уа туаггуыры станцæ. Республикæйы Промышленность æмæ транспорты министры хæстæ рæстæгмæ æххæстгæнæг Мæрзойты Владимир куыд загъта, афтæмæй ныртæккæ фарстайыл кусынц. Ныридæгæн туаггуыры æвæрæнтæ сты 50 тоннæйы бæрц. Аппаратон æмбырды ма рахастой уынаффæ Южный посёлочы 8-æм скъолайы æнæнхъæлæджы уавæр снысан кæнын. Ахуырад æмæ наукæйы министры хæстæ рæстæгмæ æххæстгæнæг Алыбегты Эллæ куыд радзырдта, афтæмæй ахуыргæнæндоны донæй дзы байдзаг сты электрон тыхдæттæг уарт æмæ пъадвал. Сергей Меняйло бабар кодта пъадвал донæй суæгъд кæнын æмæ фарста аиуварс кæнынæн фæстауæрцгæнæн фондæй æхцайы фæрæзтæ рахай кæнын. Регионы разамонæг ма куыд фæбæрæг кодта, афтæмæй йæм æрæджы Мæздæджы цæрджытæй æрбацыд хъаст. Районы дзулы аргъыл бафтыд. Районты разамонджытæ æмбырды рæстæг фæнысан кодтой, хъармгæнæн рæстæг районты куыд райдыдта æмæ цавæр къуылымпыдзинæдтимæ сæмбæлдысты, уый тыххæй. Ныридæгæн сæ аиуварс кодтой. Сергей Меняйло сæм фæсидт, цæмæй цæрджыты курдиæттæ æвæстиатæй иуварсгонд цæуой. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv