Битарты Вячеславы ныстуан

Парламенты пленарон залы лæууæн бынæттæ дæр нал баззад. Битарты Вячеславы æрвылазон ныстуан фенынмæ æрбацыдысты нæ республикæйы парламенты æмæ паддзахадон думæйы депутаттæ, министрадты, республикон комитетты, районты разамынды æмæ æхсæнадон организациты минæвæрттæ. Нæ республикæйы сæргълæууæг æрдзырдта нæ регионы æппæты вазыгджындæр социалон æмæ экономикон фарстатыл. Йæ раныхасы райдыдта нæ бæстæйы президент Владимир Путины уынаффæтæй. Битарты Вячеславы ныхæстæм гæсгæ нæ республикæйæн федералон центр кæны стыр æххуыс. Уыцы фæрæзтæй арæзт æрцæудзысты 50 вазыгджын социалон объекты. Ныртæккæ ныхас цæуы 1 миллиард сомы райсыны тыххæй. Ныстуаны бæрæггонд æрцыдысты, цавæр федералон программæтæ æххæстгонд æрцыдысты нæ республикæйы, уыдон. Зæгъæм 300 милуан сомы хардзгонд æрцыд, Беслæны теракты чи уыд, уыцы адæмæн хæдзæрттæ æлхæныныл. Зæххы хæйттæ райстой 340 бирæ сывæллонджын бинонтæ. Ноджы 500 - йæ та лæууынц рады. Ветерантæн æмæ йе нæниздзинад хъыгдард кæмæн у, уыдонæн дæр ног цæрæн бынæттæ лæвæрд æрцыд. Нæ республикæйы сæргълæууæджы ныхæстæм гæсгæ, 1 миллард æмæ 400 милуан сомы хардзгонд æрцæудзæн ацы аз цæрæн бынæтты дæттыны фарста алыг кæнынæн. Битарты Вячеслав ма радзырдта, цы ног объекттæ арæзт æрцыдысты ивгъуыд азы, уый тыххæй дæр. Се хсæн республикон рынчындоны ног инфекцион корпус, ног скъола Сырх Дыгуры, культурæйы галуантæ районты, сывæллæтты рæвдауæндæттæ. Ацы аз дæр уыцы куыст кæндзысты дарддæр. Тарниз дзæбæхгæнæн рынчындон арæзт цæуы поселок Южныйы, Елхоты байгом кæндзысты ног скъола, Дзæуджыхъæуы 27-æм скъола цалцæг кæнынц. Ацы аз ма фæзындзæн 5 ног рæвдауæндоны горæты æмæ районты. Культурæ æмæ ахуырадыл дæр бæстон æрдзырдта нæ республикæйы сæргълæууæг. Курдиатджын сывæллæттæн байгом кæндзысты, æмбал кæмæн нæ уыдзæн, ахæм технопарк "Кванториум. Йе нæниздзинад хъыгдард кæмæн у, уыцы сывæллæттæн хуыздæр кæнынц ахуыры уавæртæ. Битарты Вячеслав бабар кодта хицауадæн, цæмæй алы районы дæр æнцонвадаты программæ арæзт æрцæуа. Уымæй уæлдай ма, алайнаг гимназы ахуыргæнинæгтæн ныффысын хъæуы æмбæлгæ ахуыргæнæн æрмæг. Стæй æрыгон ахуыргæнджытæн хъæуы æххуыс кæнын. Битарты Вячеслав ма æрдзырдта фæсивæдон политикæйы тыххæй, æхсæнадон организациты, экологийы, туризм, финансты, хъæууон хæдзарад, промышленность æмæ инвестициты тыххæй дæр. Алы къабазы дæр республикæ цæмæй раппæла,уый ис. Зæгъæм, инвестицион ахадындзинадмæ гæсгæ нæ республикæ 7 хатты уæлдæр схызт иннæ регионты `хсæн. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv