Кадджын уазджытæ

Абон Цæгат Ирыстонмæ схæццæ сты уазджытæ дард бæстæйæ - Финляндийæ. Се `хсæн уыдис нæ бæстæйы Финляндийы минæварады æххæстбарджын министр дæр. Цæмæй сæ балц сæххæст уа, ууыл бацархайдта нæ республикæйы национ ахастдзинæдты хъуыддæгты фæдыл министрад. Уазджытæ уал Цæгат Ирыстоны уыдысты цалдæр ран. Цавæр хæсимæ ссыдысты æмæ цы бынæттæ бабæрæг кодтой, уый тыххæй нын радзурдзæн Хуасдзауты Алинæ. Йе `рмæг нæ эфирмæ у цæттæ. Табуафси, бакæсут æм. Делегацийы уæнгтæ фыццаджыдар бабæрæг кодтой Беслæны теракты амæттæгты мемориал «Город ангелов», зæгъгæ. Сæвæрдтой дзы дидинджытæ. Уый фæстæ араст сты Беслæны фыццæгæм съоламæ. Уым дæр та дидинджытæй саив кодтой. Дарддæры фæткмæ гæсгæ уазджытæ абалц кодтой Цæгат Ирыстоны паддзахадон университетмæ. Семæ сластой финнаг къамисæг Лииса Йокинены равдыст. Фенæн дзы уыд Хельсинки æмæ Мæскуыйы ист къамтæ. Делегицийы минæвæрттæ куыд фæбæрæг кодтой, афтæмæй равдыстæн йæ сæйраг хæс у нырыккон Финляндиимæ адæмы базонгæ кæнын. Антти Хелантерия, Финляндийы минæварады æххæстбарджын минæвар Уæрæсейы: «Фарон ам куы уыдыстæм, йæд æй бамбæрстам, нæ бæстæ уæм цымыдисаг кæй фæкаст, уый. Фæнды нæ, нæ культурæ куыд бирæвæрсыг у, уый равдисын. Уæрæсейы Финляндийы культурæимæ хорз зонгæ сты, фæлæ йын йæ нырыккон æууæлтæ бирæтæ нæ зонынц. Нæ балцы сæйраг хæс раиртасын зын у. Уæ республикæ уын хуыздæр базонын дæр нæ фæнды, стæй нæхи культурæ равдисын дæр. Алы къабæзты дæр нæ бæстæты `хсæн бастдзинæдтæ фидардæр кæнын». Финлянди æмæ Цæгат Ирыстоны `хсæн бастдзинæдтæ бирæвæрсыг сты. Цæгат Ирыстоны паддзахадон университеты минæвæрттæ ныридæгæн дыууæ хатты бабæрæг кодтой Финляндийы æмæ Европæйы сæйрагдæр университеттæй иу Туркуйы. Университетты æмгуыстад нæ ахуырадыл хуыздæрырдæм фæбæрæг уыдзæн, ууыл нæ республикæйы паддзахадон университеты ректор Огъуаты Алан дызæрдыг нæ кæны. Огъуаты Алан, ЦИПУ-йы ректор: «Нæ университеты делегаци Финляндийы архайдта педагогикæ æмæ фармацевтикон къабæзтыл. Туркуйы университет æнæхъæн дунейы дæр зонынц, куыд инновацион центр. Уымæ гæсгæ та архайæм, цæмæй нæ университеттæ иумæйагæй архайой зонадон æмæ иртасæн гранттыл. Стæй мах университеты студенттæ уырдæм ацæудзысты, уыдон та - махмæ. Финляндийы фæлтæрддзинад нын тынг ахсджиаг у. Ныфс нæ ис æмæ не `мгуыстад хорз хатдзæгтæм кæй æрцæудзæн». Делегацийы уæнгтæ семæ сластой Нинни Рокосы документалон киноныв «Daddy loves you». Æвдыст дзы цæуы боксеры уæззау хъысмæт. Делегацийы уæнгтæ куыд фæбæрæг кодтой, афтæмæй кинонывы бюджет кæд стыр нæ уыд, уæддæр ирдæй æвдисы нырыккон царды æууæлтæ. Къорд суазæг кодтой нæ республикæйы нациты `хсæн ахастдзинæдты министрад. Куыд зæгъынц, афтæмæй нæ бæстæты бастдзинæдтæ рагон сты. Ирон æвзаджы фыццаг грамматикæйы чиныг дæр ныффыста финнаг ахуыргонд Андрей Шегрен. Уазджытæ ма семæ сластой финнаг фольклорон зарæггæнджты къорд. Уыдон райсом сараздзысты концерт университеты физикон-техникон факультеты. Делегаци ма фембæлдзæн университеты ахуыргæнджытимæ. Бакæсдзысты сын лекци Финляндийы ахуырадон системæйы тыххæй. Нæ республикæйы уыдзысты 29 майы онг. Уыцы рæстæгмæ сæ программæ у цымыдисаг æмæ бирæвæрсыг. Уый фæстæ та абалц кæндзысты Мæхъæлы республикæмæ. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv