Дæхи арæзт продукт æмæ дæ авторон бартæ куыд хъуамæ бахъахъхъæнай ныртæккæйы рæстæджы? Плагиатæй хи бахизынæн нæ республикæйы цæрджытæн ныр æххуыс кæндзæн товары нысан. Срегистраци кæнӕн æй ис 29-æм июнæй. Уый тыххæй бадæттын хъæуы курдиат центр «Мой бизнес»-мæ. Специалисттæ сæхæдæг æмбæлгæ гæххæттытæ бацæттæ кæндзысты. Фæсарæнты цы нæ балхæнай, уый Сергей йæхи æрмадзы рауадздзæн. 3Д принтерты руаджы цыфæнды дæр йæ бон у саразын. Æмæ афтæ кусы ныр 6 азæй фылдæр. Уый бæрц чи бакусы, уыцы амалхъом адæймаджы, кæй зæгъын æй хъæуы, фæфæнды, йæ продукт ын базары куыд зоной. Уымæ гæсгæ йæ бахъуыд товары нысан. Ахæм товары нысан хъæуы Цæлыккаты Элинæйы куклатæн дæр. Аразы сæ къухæй. Ис æм йæхи æрмадз дæр. Йæ куыст рæзы. Афтæмæй фыццаг хуымæтæг хъуыдыйæ райдыдта. Фыдæбон кодта, йæ тых æмæ йæ рæстæг не 'вгъау кодта. Фæлæ йæ куыстытæ интернеты кæйдæр сыфыл куы федта, уæд æй бамбæрста, йæ авторы бартæ йæ кӕй хъæуы бахъахъхъæнын. Æнæ уымæй йæ хъуыддаг нæ сырæздзæн. Товары нысан хæдбарæй кусджытæ æмæ хицæн адæймæгтæн сæ бон снысан кæнын у 29-æм июнæй. Уæд продукттæ фылдæр æлхæнджытæ базонынц, стæй бизнес дæр рæзы франшизæ уæй кæныны руаджы. Центр «Мой бизнес»-ы куыд зæгъынц, афтæмæй дзы зынæй ницы ис. Товары нысан у - æнæматериалон бизнес-актив. Нысаны бартæ ис ауæй кæнын, кæнæ та быны хуызæн искæмæн раттын. Сæйрагдæр та уый у, æмæ афтӕмӕй плагиатæй кæй сты хъахъхъæд. Ныртæккæ уый ахсджиаг фарста у, уымæн æмæ нæ регионы ис 32 мин хæдбар кусæджы. Фæтк ног у æмæ куыд кусдзæн, уый сбæрæг уыдзæн фæззæгмæ хæстæгдæр. Ныртæккæ уал амалхъом адæм закъонимæ зонгæ кæнынц, сæ гæххæттытæ æмбырд кæнынц æмæ бизнес инкубаторты ног фæткы домæнтыл дзурынц. Специалистты ныхæстæм гæсгæ, товары нысан регистраци кæнгæйæ гæххæттытимæ ракæ-бакæйы куыст нæй.