Иудзинадмæ фæндаг

Цавæр фидæн нæм æнхъæлмæ кæсы æмæ дзы цавæр æвзагыл дзурдзыстæм? Ирон æвзаг, культурæ æмæ традицитæ бахъахъхъæнын æмæ дыууæ республикæйы цæрджыты æрбангом кæныныл ныхас кодтой Цæгат æмæ Хуссар Ирыстоны бæрнон кусджытæ. Нæ республикæйы делегаци, йæ сæргъы Тускъаты Таймураз, афтæмæй, кусæг балцы уыдис Цхинвалы. Фембæлдысты Бибылты Анатолиимæ. Бæстон цавæр фарстатыл ныхас кодтой, се ргом цæмæ аздæхтой, ахсджиаг хъуыддæгтыл цы банымадтой æмæ цавæр бадзырдтæ бафыстой, уый зонынц нæ уацхæсджытæ.  Дыууæ республикæйы тыхтæ баиу кæнын, культурæ, æвзаг æмæ ирон традицитæ бахъахъхъæнын. Хуссар Ирыстоны президент Бибылты Анатолий æмæ Цæгат Ирыстоны хицауады сæрдар Тускъаты Таймураз сæ фембæлды рæстæг æрдзырдтой ахсджиаг фарстатыл. Фыццаджыдæр национ культурæйы рæзтыл. Куыд фæнысан кодтой афтæмæй ахæм æмбырдтæ хорзырдæм ахадынц, æмæ сты пайдайаг. Анахарсисы номыл наукон библиотекæйы та æмбырд сарæзтой Терминологон къамисы эксперттæ. Тускъаты Таймураз æмæ Бибылты Анатолий дзы се `ргом аздæхтой ирон адæмы хиæмбарынад фидар кæнын кæй хъæуы, уымæ. Уый ныртæккæ сæйрагдæр хæс у. Цæгат æмæ Хуссар Ирыстоны республикæты минæвæрттæ се ппæты базонгæ кодтой сæ курдиæттæ æмæ фæндонтимæ. Цæгат Ирыстоны национ ахастдзинæдты фарстаты министр Цуциты Асланы ныхæстæм гæсгæ хъæуы иумæйаг наукон журнал саразын. Куыд æм кæсы, афтæмæй археологон экспедицитæ дæр æмгуыст куы кæниккой, уæд уый наукæйыл хуыздæрырдæм фæзындзид. Уыимæ ахæм куыстмæ æрыгон специалистты хъæуы разæнгард кæнын . Мыхуыры æмæ дзыллон фæрæзты комитеты сæрдар Фидараты Юрий радзырдта æрыгон журналистты форумы тыххæй. Вæййы æрвылаз Цæгат Ирыстоны. Форум "Алания-Медиа"-йы архайынмæ хоны Хуссар Ирыстоны дзыллон информацион фæрæзтæ дæр. Хæдбар паддзахады премьер Пухаты Эрик куыд бафиппайдта, афтæмæй сæ иумæйаг куыстæн ис стыр нысаниуæг æмæ уыдзæн пайдайаг. Экспертон-терминологон къамисы иумæйаг æмбырд фыццаг хатт уыд. Арæзт æрцыд "18-æм азæй 20-æм азмæ ирон адæмы национ-культурон райрæзты" паддзахадон программæйы фæлгæты. Цæгат Ирыстоны йæ фарон декабры æххæст кæнын райдыдтой.  Фембæлды кæронбæттæн дыууæ паддзахады минæвæрттæ бафыстой бадзырдтæ. Ныр дыууæ республикæйы сараздзысты куыстадон къорд. Йæ хæс уыдзæн æмбырды цы фарстатыл дзырдтой, уыдоныл бакусын æмæ сæ сæххæст кæнын . _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv